ҚР Ауыр атлетика федерациясының президенті болып Жанат Түсіпбеков сайланды

Наурыз 17, 2023

Бүгін, 17 наурызда Астанада Қазақстан Республикасы Ауыр атлетика федерациясының сайлау конференциясы өтті. Бастапқыда федерация президенттігіне екі үміткер – Илья Ильин мен Гаджи Гаджиев жарияланды. Алайда кандидаттардың бастамасымен және федерация мүшелерінің қолдауымен Түсіпбеков Жанат Рашидұлына Федерацияны басқару ұсынылды.

Федерация мүшелері, 26 адам Жанат Түсіпбековтің кандидатурасын бірауыздан қолдады.

Естеріңізге сала кетейік, Жанат Рашидұлы 2013 жылдан 2022 жылға дейін ҚР ААФ басқарған. Оның басшылығымен біздің команда сегіз олимпиада медалін жеңіп алды (2016 жылы алты, 2020 жылы екі).

Жанат Түсіпбеков:

– Бүгін маған білдірген қолдау сөздеріңіз бен сенімдеріңіз үшін көп рахмет. Бүгін біз бірігіп, әркімнің мүддесін ескере отырып, бір мақсатқа бірге қадам басуға бұрынғыдан да жақынбыз! Болашақта біз жаңа ұйымдық құрылым құруды көздеп отырмыз, осы мүмкіндікті пайдаланып Гаджи Шапиевичті де, Илья Александровичті де шақырғым келеді. Өйткені, Федерация қоғамдық ұйым және біз қоғам игілігі үшін жұмыс істеуге шақырылғанбыз. Бүгінгі таңда бізде қазақстандық ауыр атлетиканы жаңа деңгейге шығару үшін бәрі бар!

Гаджи Гаджиев өз сөзінде олимпиадаға аз уақыт қалғанда күрделі түзетулер енгізудің жөн еместігін, сондықтан ол Жанат Түсіпбековтің кандидатурасын толық қолдайтынын және Федерацияны қолдауға дайын екенін атап өтті.

Илья Ильин:

– Кеше кешке дейін сөйлесіп, кеңесіп, Ауыр атлетика федерациясының президенттігіне одан асқан кандидат жоқ деп шештік. Бұл бүкіл команда үшін жақсы болады! Жанат Рашидұлы 2013 жылдан бері үлкен жұмыс атқарды, спортымызды іштей біледі. Баршаңызды бірлікке шақырамын! Барлық мәселелерді бірге шешіп, алтын медальдарымызға бірге барайық!